प्रेमकुमार राईको ‘आत्मवृत्तान्त’ लोकार्पण

काठमाडौं, असोज २६ । सोलुखुम्बुको थुलुङ दुधकोशी गाउँपालिका–५, जुबुमा जन्मिएका प्रेमकुमार राईको आत्मवृत्तान्त शनिबार काठमाडौंको बागबजारस्थित हार्दिक होटलमा लोकार्पण गरिएको छ। नेकपाका नेता नारायणकाजी श्रेष्ठ, पूर्वमन्त्री गिरिराजमणि पोखरेल र थुलुङ दुधकोशी गाउँपालिकाका पूर्वअध्यक्ष असिम राईलगायतको उपस्थितिमा पुस्तक सार्वजनिक गरिएको हो।

२००९ साल चैत १० गते जन्मिएका ७६ वर्षीय राईले शिक्षा, राजनीति र समाजसेवामा लामो समय योगदान दिएका छन्। उनले २०३० देखि २०६९ सालसम्म जनजागृति निम्न माध्यमिक विद्यालयको प्रधानाध्यापकका रूपमा ४० वर्षभन्दा बढी सेवा गरेका थिए।

पुस्तकमा नेपालको सामन्तवादविरोधी आन्दोलन, पञ्चायतविरोधी सङ्घर्ष, भूमिगत राजनीति, वामपन्थी सङ्गठन निर्माण, २०३५ सालको विद्यार्थी आन्दोलन तथा सोलुखुम्बुको शैक्षिक, सामाजिक र सांस्कृतिक इतिहास समेटिएको छ। थुलुङ राई समुदायको इतिहास, संस्कृति र वंशावलीसँगै लेखकका व्यक्तिगत सङ्घर्ष र जीवन अनुभवसमेत पुस्तकमा समावेश छन्।