मंगलबार नेप्से परिसूचक ९.२४ अंकले बढ्यो

काठमाडौं, भदौ १७ । लगातार ६ दिन घटेर सातौं दिन सेयरबजार परिसूचक नेप्से बढेको छ । आज नेप्से ९.२४ अंकले बढेर २ हजार ५२२.६६ विन्दुमा पुगेको हो । आज सेयरबजारमा ३४१ कम्पनीका सेयर कारोबार भएका छन् । यी मध्ये १८१ कम्पनीका सेयरमूल्य बढेका छन् भने ८४ कम्पनीका सेयरमूल्यमा गिरावट आएको छ । बाह्र कम्पनीका सेयरमूल्य भने स्थिर रहेका छन् ।

आज कुल ७६ लाख १३ हजार ६८१ कित्ता सेयर ४८ हजार ३४१ कारोबारबाट २ अर्ब ९० करोड ६९ लाख ४४ हजार रुपैयाँमा किनबेच भएको छ । कारोबार रकम सोमबारको तुलनामा २०.३३ प्रतिशतले कमी हो । आज सेयरबजारमा सूचीकृत समूहमध्ये उत्पादनशील तथा प्रशोधन समूहको परिसूचक मात्रै घटेको छ । अरु सबै समूहका परिसूचक बढेका छन् ।

सबैभन्दा धेरै जलविद्युत समूहको परिसूचक १.०१ प्रतिशतले बढेको छ । माथिल्लो मैलुङखोला जलविद्युत लिमिटेड, एमवीएल इक्वीटी फण्ड, इमर्जिङ नेपाल लिमिटेड, साञ्जेन जलविद्युत कम्पनी तथा मेन्छियाम हाइड्रोपावर लिमिटेडका सेयरधनीले सबैभन्दा बढी कमाएका छन् ।

सबैभन्दा बढी गुमाउनेमा भने उपकार लघुवित्त वित्तीय संस्था, घोराही सिमेन्ट इन्ड्रष्टीज, सिवाईसी नेपाल लघुवित्त वित्तीय संस्था, भगवती हाइड्रोपावर डेभलपमेन्ट कम्पनी तथा सिद्धार्थ इन्भेष्मेन्ट ग्रोथ स्किमका सेयरधनी रहेका छन् ।