देशका विभिन्न स्थानमा मुख्य राजमार्ग अवरुद्ध

देशभर भइरहेको लगातारको वर्षाका कारण प्रमुख राजमार्ग तथा सडक खण्डहरू पहिरो र बाढीका कारण अवरुद्ध भएका छन्।

नेपाल प्रहरीले दिएको जानकारी अनुसार बुधबार बिहान ७ बजेसम्म सिन्धुपाल्चोक, इलाम, बागलुङ, पाँचथर र गोरखा लगायतका क्षेत्रमा सडक पूर्ण रूपमा बन्द छन् भने अन्य केही स्थानमा सुरक्षाका कारण रात्रिकालीन यातायात सेवामा रोक लगाइएको छ।

बीपी राजमार्गअन्तर्गत काभ्रेपलाञ्चोक र सिन्धुलीको खुर्कोट-नेपालथोक-कटुन्जेबेँसी सडक खण्डमा सम्भावित बाढीको जोखिमलाई मध्यनजर गर्दै अर्को सूचना नभएसम्मका लागि बेलुका ६ बजेदेखि बिहान ४ बजेसम्म सम्पूर्ण सवारी साधन चलाउन रोक लगाइएको छ। यद्यपि, बिहान ४ बजेदेखि बेलुका ६ बजेसम्म भने सवारी साधनहरू सुचारु हुनेछन्। त्यस्तै, मकवानपुरको कान्ति लोकपथमा वर्षातका कारण सवारी सुरक्षालाई ध्यानमा राख्दै रात्रिकालीन समयमा सबै किसिमका सवारी साधन चलाउन रोक लगाइएको छ।

इलामको मेची राजमार्गअन्तर्गत इलाम नगरपालिका-९, राजदुवालीमा वर्षाका कारण बाटो हिलो भई सवारी साधन आवतजावत गर्न नसक्दा सडक पूर्ण रूपमा अवरुद्ध भएको छ। तर, उक्त स्थानमा वैकल्पिक बाटो भने प्रयोग गर्न सकिनेछ। सिन्धुपाल्चोकको अरनिको राजमार्गअन्तर्गत भोटेकोशी गाउँपालिका-४, जिरोकिलोमा सडक माथिबाट पहिरो खस्दा र सोही गाउँपालिका-२ कोदारीस्थित ईकु पहिरोमा ढुंगा र माटो सहितको लेदो खसेका कारण यातायात सेवा पूर्ण रूपमा अवरुद्ध बनेको छ।

बागलुङस्थित कालीगण्डकी करिडोरको जैमिनी नगरपालिका-८, बेलबगर सडक खण्डमा माथिबाट ढुंगा र माटोसहितको पहिरो खस्दा बाटो पूर्ण रूपमा बन्द भएको छ। त्यसैगरी, पाँचथरको राँके रवि भेडेटार सडक खण्डअन्तर्गत मिक्लाजुङ गाउँपालिका-४, कोप्चेमा अविरल वर्षाका कारण पहिरो झर्दा सडक अवरुद्ध भएको छ भने गोरखाको आरुघाट माछिखोला सडक खण्डअन्तर्गत धार्चे गाउँपालिका-७, लिदिङमा लेदो पहिरो खस्दा यातायात पूर्ण रूपमा ठप्प भएको छ।

बाढी र पहिरोको जोखिम अझै कायम रहेकोले प्रहरीले नागरिकहरूलाई यात्रामा निस्किनुअघि सम्बन्धित सडकको अवस्था बारेमा राम्ररी जानकारी लिन आग्रह गरेको छ।