‘गौँथली’को दृश्य सामाजिक सञ्जालमा सार्वजनिक नगर्न निर्देशक रिजालको आग्रह

साउन १ देखि प्रदर्शनमा आएको चलचित्र ‘गौँथली’ले बक्स अफिसमा सकारात्मक व्यापारिक लय समातेको छ। प्रदर्शनको सुरुवाती दिन (शुक्रबार) औसत व्यापार गरेको यस चलचित्रले शनिबार र आइतबार भने अपेक्षाभन्दा उत्कृष्ट व्यवसाय गर्न सफल भएको निर्माण टिमले जनाएको छ।

दर्शकको चाप बढेसँगै हल सञ्चालकहरूले पनि चलचित्रको शो सङ्ख्यामा क्रमशः वृद्धि गर्दै लगेका छन्।

यसै क्रममा ‘गौँथली’का महत्वपूर्ण दृश्य खिचेर सामाजिक सञ्जालमा पोस्ट गर्ने क्रम बढेसँगै निर्देशक रिजालले दर्शकलाई यसो नगर्न आग्रह गरेका छन्।

सामाजिक सञ्जालमार्फत एक अपिल जारी गर्दै निर्देशक रिजालले चलचित्रलाई दर्शकले दिएको माया, साथ र हौसलाप्रति आभार व्यक्त गरेका छन्। पछिल्ला दिनमा चलचित्रका दृश्यहरू फेसबुक, टिकटकलगायत सामाजिक सञ्जालमा पोस्ट गर्ने क्रम बढेको भन्दै यसले अन्य दर्शकको उत्सुकता घटाउनुका साथै सिनेमा र निर्माण पक्षको लगानीमा समेत प्रत्यक्ष असर पर्ने बताएका छन्।

निर्देशक रिजालले लेखेका छन्, ‘सामाजिक सञ्जालमा फिल्महरू भेटिदा यसले व्यावसायिक, सृजनात्मकसँगै कलात्मक क्षति पनि गरिरहेको छ। सिनेमा हेर्न आउने दर्शकले अगाडि नै दृश्य थाहा पाउँदा त्यसले राम्रो गर्दैन, त्यसैले हामीले भिडियो खिच्ने विरुद्ध कानुनी रूपमा अगाडि बढिसकेका छौँ।’

उनले त्यस्ता गतिविधि नगर्न दर्शकसँग विनम्र अनुरोध गर्दै यस विषयमा कानुनी प्रक्रिया पनि अघि बढाइसकिएको जानकारी दिएका छन्।

मंगलबार पनि देशभरका अधिकांश हलमा चलचित्रको अकुपेन्सी उत्साहजनक रहेको निर्माता सुमन गिरीले जानकारी दिए। बिहानका शोमा ७०/८० प्रतिशतसम्म र दिउँसोदेखिका शोमा पनि शतप्रतिशत अकुपेन्सी रहेको उनको भनाइ छ।

भोला रिजाल प्रोडक्सन र सुमन गिरी प्रोडक्सनको प्रस्तुतिमा निर्माण भएको चलचित्रमा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सञ्जोग रसाइली, सीतादेवी तिमिल्सिना, लक्ष्मीनाथ तिमिल्सिनालगायत कलाकारको अभिनय रहेको छ।