भैरहवा भन्सारबाट १ खर्ब ५ अर्ब राजश्व सङ्कलन, २ खर्ब ६९ अर्ब बढी व्यापार घाटा

भैरहवा भन्सारले यसपालि पनि राजश्व सङ्कलनमा विभागले दिएको लक्ष्य भेट्टाउन सकेन। गत आर्थिक वर्ष २०८२/०८३ मा यो भन्सारले १ खर्ब ५ अर्ब २ करोड रुपैयाँ राजश्व सङ्कलन गरेको छ।

यो रकम लक्ष्यको ९२ दशमलव ४ प्रतिशत हो। भन्सार विभागले भैरहवालाई १ खर्ब १३ अर्ब ६६ करोड राजश्व सङ्कलनको लक्ष्य तोकिदिएको थियो।

अघिल्लो आर्थिक वर्षको तुलनामा भने यसपालि राजश्व सङ्कलनमा १३ प्रतिशतले वृद्धि भएको छ। आर्थिक वर्ष २०८१/०८२ मा भैरहवाले ९५ अर्ब १९ करोड ३८ लाख राजस्व सङ्कलन गरेको थियो।

भैरहवाका प्रमुख भन्सार अधिकृत हरिहर पौडेलले लक्ष्य निर्धारण गरिने विधि वैज्ञानिक नभएको भन्दै अघिल्ला वर्षको तुलनामा राजश्व सङ्कलनमा उल्लेख्य वृद्धि हुनु सकारात्मक भएको प्रतिक्रिया दिए।

भैरहवा राजश्व सङ्कलनको हिसाबले देशकै दोस्राे ठुलो भन्सार नाका हो। पछिल्ला केही वर्ष यता यो भन्सारले लक्ष्य भेट्टाउन सकिरहेको छैन।

भन्सार प्रमुख पौडेलका अनुसार रुपन्देही, नवलपरासी, कपिलबस्तु लगायतका जिल्लामा उत्पादनमूलक उद्योग फस्टाउन नसकेको र भएका उद्योगहरू पनि फुल फेजमा सञ्चालन हुन नसक्दा कच्चा पदार्थको आयात तुलनात्मक रूपमा घट्दा त्यसको असर राजश्व सङ्कलनमा परेको हो। ‘हामी कहाँ लक्ष्य तोक्ने वैज्ञानिक विधिको पनि अभाव छ’ पौडेलले भने।

गत आर्थिक वर्षमा भन्सार विभागले देशभरबाट कुल ५ खर्ब ८८ अर्ब राजश्व सङ्कलनको लक्ष्य निर्धारण गरेकोमा कुल लक्ष्यको १९ दशमलव ३ प्रतिशतको जिम्मेवारी भैरहवालाई दिएको उनले बताए।

सुरक्षा निकायहरूसँगको समन्वयमा राजश्व चुहावट र तस्करी नियन्त्रणमा विशेष अभियान नै सञ्चालन गरिएको भएपनि खुल्ला सीमा चुनौतीकै रूपमा रहेको उनले बताए। ‘बेलहिया नाका पारी भारततर्फ र वारी सडक साँगुरो हुँदा लामो समय जाममा बस्नु पर्ने समस्याका कारण व्यवसायीले अन्य नाका रोज्न थालेका छन्,’ पौडेलले भने।

२ खर्ब ६९ अर्ब बढी व्यापार घाटा

भैरहवा भन्सारको गत आर्थिक वर्षको व्यापार घाटा २ खर्ब, ६९ अर्ब ६ करोड ६५ लाख छ। यसपालि भैरहवाबाट ३ खर्ब ४ अर्ब ५ करोड रुपैयाँ बराबरको मालसामान आयात भएको थियो। निर्यात जम्मा ३४ अर्ब ९८ करोड ३५ लाख मुल्य बराबरको भएको थियो।

अघिल्ला वर्षहरूको तुलनामा यसपालि निर्यातमा सुधार देखिएपनि आयातको तुलनामा निर्यात नगण्य नै रहेको भन्सार प्रमुख पौडेलले बताए।

भैरहवाको कुल राजश्व सङ्कलनको झण्डै २५ प्रतिशतभन्दा बढी हिस्सा अटो मोवाइल्सको रहेको कार्यालयले जनाएको छ।

यो वर्ष भैरहवास्थित बेलहिया नाकाबाट सबैभन्दा धेरै २२ अर्ब ८३ करोड ५८ लाख मूल्यका १ लाख ७८ हजार २१५ वटा मोटरसाइकल आयात भएको छ।

९ अर्ब ५९ करोड ८१ लाख मूल्यका ७ हजार १५९ वटा जिप कार भ्यान आयात भएका छन्। २ अर्ब ५४ करोड ७२ लाखका २ हजार ४१२ वटा पिकअप गाडी आयात भएको छ।

१५ अर्ब ९६ करोड १३ लाखको स्पन्ज आइरन र ८ अर्ब ४६ करोड १४ लाखको एम एस विलेट आयात भएको छ । ८ अर्ब १० करोड ५८ लाख मूल्यको ७६ हजार किलोलिटर पेट्रोल आयात भएको छ।

८ अर्ब ६४ करोड ५१ लाख मूल्यको एल.पि.ग्यास आयात भएको छ। ८ अर्ब ५९ करोड ८ लाख मूल्यका २ लाख ५१ हजार २५४ थान मोबाइल भैरहवा भन्सारबाट आयात भएको छ । ६ अर्ब २९ करोडको कोइला र १ अर्ब ५६ करोडको सुपारी आयात भएको भैरहवाको सङ्कलित राजश्वमा यी दश मुख्य बस्तुको योगदान ५१ दशमलव ५१ प्रतिशत छ।

भैरहवा भन्सारबाट निर्यात हुने मुख्य १० बस्तुहरूमा भटमासको प्रशोधित तेल, सेन्थेटिक यार्न,आल्मुनियमका तार, स्टिल वा फलामका भाँडाकुँडा, सिमेन्ट खैरो,चाउचाउ नुडल्स्,पास्ता, सूर्यमुखीको प्रशोधित तेल, खयर कत्था, प्लाइउड र कोइला छन्।

यो वर्ष १३ अर्ब ७३ करोड बढी मूल्यको भटमासको तेल निर्यात भएको छ । ३ अर्ब ५९ करोड बढी मूल्यको सेन्थेटिक यार्न,३ अर्ब ५७ करोड बढीको आल्मुनियमका तार निर्यात भएको छ।

१ अर्ब ५१ करोडको बढीको खैरो सिमेन्ट निर्यात भएको छ। १ अर्ब ३० करोड बढीको चाउचाउ,नुडल्स् तथा पास्ता निर्यात भएको छ। १ अर्ब ५ करोडको खयर कत्था र १ अर्ब १ करोड बढी मूल्यका स्टिलका भाँडाकुँडा निर्यात भएको छ । ८१ करोड ३९ लाखको सूर्यमुखीको तेल निर्यात भएको छ। ८० करोड बढीको प्लाइउड र ७९ करोड बढी मूल्यको चोकर भुस निर्यात भएको छ।

चालु आर्थिक वर्ष २०८३/०८४का लागि विभागले भैरहवालाई १ खर्ब २२ अर्ब राजश्व सङ्कलनको लक्ष्य दिएको छ । यो वर्ष भन्सारले देशभरबाट कुल ६ खर्ब २८ अर्ब राजश्व सङ्कलन गर्ने लक्ष्य लिएको छ। विभागको कुल लक्ष्यको १९ दशमलव ४ प्रतिशत राजश्व यो वर्ष भैरहवाले उठाउनु पर्ने छ।